Christian Schmitt í Akureyrarkirkju

Laugardaginn 13. desember nk. heldur þýski organistinn Christian Schmitt tónleika í Akureyrarkirkju. Tónleikarnir hefjast kl. 17.00. Schmitt hefur leikið með öllum helstu sinfóníuhljómsveitum Evrópu og er nú um stundir sérstakur orgelráðgjafi Fílharmóníusveitar Berlínar.  

Christian Schmitt fæddist árið 1976 í Erbringen í Þýskalandi. Hann er einn eftirsóttasti konsertorganisti heimsins í dag og árið 2013 hlaut hann hin eftirsóttu Echo-verðlaun sem eru ein æðstu verðlaun tónlistarmanna í Þýskalandi. Schmitt lærði kirkjutónlist og konsertleik í Saarbrücken og orgelleik hjá James David Christie í Boston and Daniel Roth í París. Hann hefur borið sigur úr býtum í meira en tíu alþjóðlegum orgel– og tónlistarkeppnum í Atlanta, Brugge, Calgary, Fíladelfíu og Tókíó. Hann sigraði í Tónlistarkeppni Þýskalands árið 2001 og árið 2003 var hann sæmdur Pro Europa viðurkenningu Menningarráðs Evrópu.  

Christian Schmitt hefur haldið tónleika víða um veröld og gefið út hátt í 40 geisladiska með orgelleik sínum. Efnisskrá hans er afar fjölbreytt og er að þessu sinni meðal annars að finna á henni verk eftir Johann Sebastian Bach, Olivier Messiaen, Carl Philipp Emanuel Bach og Charles Frost.  

Sendiráð Þýskalands á Íslandi, ásamt Akureyrarstofu, býður Akureyringum að njóta tónleika Christians Schmitts í Akureyrarkirkju án endurgjalds.