23.02.2006
Það styttist í hina eiginlegu föstu kirkjuársins, lönguföstu sem hefst á öskudag. Fyrir nokkru hófst lestur Passíusálma sr. Hallgríms í útvarpinu. Segja má að lesturinn sé eini fasti punkturinn í tilverunni sem minnir okkur á föstutímann, fyrir utan auðvitað helgihald kirkjunnar sem tekur mið af hverri tíð kirkjuársins. Fáir ef nokkrir nota föstuna nú á dögum til að fasta í bókstaflegum skilningi og mataræði heimilanna breytist lítt þótt fasta sé gengin í garð. Við etum fisk og klauflax jöfnum höndum. Enn er þó ekki búið að finna upp á opinberum föstuveislum í anda jólahlaðborða á jólaföstunni en hver veit hvað framtíðin ber í skauti sér? Kannski verður afturhvarf. ... (sjá fleiri ,,Glefsur" hér vinstra megin á síðunni)
<P>Það styttist í hina eiginlegu föstu kirkjuársins, lönguföstu sem hefst á öskudag. Fyrir nokkru hófst lestur Passíusálma sr. Hallgríms í útvarpinu. Segja má að lesturinn sé eini fasti punkturinn í tilverunni sem minnir okkur á föstutímann, fyrir utan auðvitað helgihald kirkjunnar sem tekur mið af hverri tíð kirkjuársins. Fáir ef nokkrir nota föstuna nú á dögum til að fasta í bókstaflegum skilningi og mataræði heimilanna breytist lítt þótt fasta sé gengin í garð. Við etum fisk og klauflax jöfnum höndum. Enn er þó ekki búið að finna upp á opinberum föstuveislum í anda jólahlaðborða á jólaföstunni en hver veit hvað framtíðin ber í skauti sér? Kannski verður afturhvarf. Farið verður að fasta síðustu dagana fyrir stórhátíðir, eða amk gera ekki eins myndarlega við sig í mat í aðdragandanum. Heilbrigð skynsemi segir að auðvitað myndum við njóta jólasteikarinnar og páskalambsins betur ef við værum ekki búin að úttroða belginn af alls kyns kræsingum dagana fyrir hátíðarnar. </P>
<P>En hvað sem mataræði föstunnar líður þá er þessi tími ætlaður til þess að dýpka og þroska trúarlífið. Og ég held að þannig sé það hjá mörgum, þrátt fyrir allt. Frábæra leiðsögn í því gefur sr. Hallgrímur í Passíu sinni. Fleiri snillingar koma einnig upp í hugann sem hægt er að slást í för með á leiðinni framundan. Má þar nefna meistara Vídalín og Dr. Pjetur Pjetursson. Sá síðarnefndi kemst þannig að orði í einni af föstuhugvekjum sínum: ,, ,Hvað er sannleikur?', sagði Pílatus; og þannig spyr þú einnig, syndugur maður! Ef þú ekki spyr að því í skopi, eins og Pílatus, heldur af fullri alvöru hjartans, þá leita þú til hans, sem til þess fæddist og kom í heiminn, að bera ,,sannleikanum vitni". Hann einn getur frætt þig um hinn eilífa sannleika, því hann er sjálfur sannleikurinn og hefur orð eilífa lífsins; af hans orði getur þú leiðzt í allan sannleika, ef þú ekki byrgir eyru þín fyrir hans röddu."</P>